Seul Rossiya va Belarusga uskunalar va avtomobillar eksportini taqiqladi

Ukrainada davom etayotgan urush fonida Janubiy Koreya hukumati Rossiya va Belarusga eksport qilinishi taqiqlangan tovarlar ro‘yxatini oshirdi. Seul rasmiylari ushbu ro‘yxatning kengayganini e’lon qildi – 57 tadan 798 tagacha, deb xabar berdi "Ryonxap" axborot agentligi 24 aprel, dushanba kuni.

Yangilangan ro‘yxatga qo‘shilgan 740 dan ortiq mahsulot toifalari orasida yarimo‘tkazgichlar, kimyoviy moddalar, po‘lat, avtomobillar, texnologik uskunalar va kvant kompyuterlari bor. Shu bilan birga, cheklovlar avtomobillar, jihozlar va kompyuterlar uchun ehtiyot qismlarga taalluqli bo‘ladimi yoki yo‘qmi, aniqlashtirilmagan.

Janubiy Koreya Savdo, sanoat va energetika vazirligining ta’kidlashicha, ushbu qaror import qiluvchi mamlakatlar tomonidan mahsulotlardan qurol-yarog‘ ishlab chiqarish va harbiy maqsadlarda foydalanish ehtimoli yuqoriligi bilan bog‘liq. Shu bilan birga, Seul “istisno holatlarda” har ikki davlatga taqiqlangan tovarlarni yetkazib berish imkoniyati ko‘rib chiqilishiga va’da berdi. Yangi eksport taqiqlari 28 apreldan kuchga kiradi.

Janubiy Koreya Ukrainaga keng miqyosli bosqin boshlanganidan keyin Rossiyaga qarshi sanksiyalar kiritdi. Ushbu cheklovlar bank sektori va ayrim toifadagi mahsulotlar, xususan, mikroprotsessorlar, yarimo‘tkazgichlarni ishlab chiqarish, sinovdan o‘tkazish va tekshirish uskunalari, shuningdek, tranzistorlar va elektron jihozlar ishlab chiqarish uchun zarur bo‘lgan dasturiy ta’minotni eksport qilishga taalluqlidir.