«Qatargeyt» ishtirokchisi qamoqxonadan uy qamog‘iga o‘tkaziladi

Yevroparlamentda «Qatargeyt» nomini olgan korrupsiya mojarosida asosiy gumonlanuvchilardan biri Per Antonio Panseri tez orada qamoqxonadan uy qamog‘iga o‘tkaziladi. Bu haqda 6 aprel, payshanba kuni Panserining advokati Loran Kennes jurnalistlarga ma’lum qildi. Unga ko‘ra, Yevroparlamentning sobiq deputati bo‘lgan 67 yoshli italiyalik sudgacha elektron bilaguzuk bilan uyda saqlanadi.

Panseri yanvar oyida Belgiya prokuraturasi bilan kelishuvga erishib, tergov bilan to‘liq hamkorlik qilishga va mojaro tergoviga hissa qo‘shishga va’da berdi. Natijada, unga qisqartirilgan jazo berilishi mumkin.

Yevroparlamentdagi korrupsiya mojarosi o‘tgan yilning dekabr oyida boshlangan. YeP vitse-prezidenti Yeva Kayli va bir necha deputatlar uning ishtirokchisiga aylandi. Belgiya prokuraturasi Qatar va Marokash ular orqali «katta miqdorda pul va sovg‘alar yordamida Yevroparlament qarorlariga ta’sir o‘tkazishga» uringanlikda gumon qilmoqda. Har ikki davlat ham barcha ayblovlarni rad etdi. Mojaroni tergov qilish jarayonida Belgiya rasmiylari 1,5 million yevro naqd pulni musodara qilgan.