Toshkent viloyatida qo‘shni xonadonlarda yong‘in yuz berdi

Toshkent viloyatining Zangiota tumanida joylashgan bir-biriga tutash xonadonlarda yong‘in yuz berdi. Holat aks etgan video ijtimoiy tarmoqlarda tarqaldi. Unda yong‘in 12 soatda o‘chirilgani, o‘t o‘chirish mashinalarida suv muzlab qolgani aytilgan.

FVV matbuot xizmatining ma’lum qilishicha, haqiqatan ham 13 yanvar kuni soat 00:23 da Zangiota tumani Nazarbek hududi «Beshqo‘rg‘on» MFY Do‘stlik ko‘chasida bir-biriga tutash bo‘lgan xonadonlarda yong‘in sodir bo‘layotgani to‘g‘risida tuman FV bo‘limiga xabar kelib tushgan.

Shunga ko‘ra beshta yong‘in-qutqaruv ekipaji soat 01:03 da voqea joyiga yetib borib, yong‘in soat 02:34 da qurshab olingan va soat 05:05 da bartaraf etilgan. Yong‘in 4 soat 2 daqiqada o‘chirilgan. Yong‘in 12 soatda o‘chirilgan degan xabar haqiqatga to‘g‘ri kelmaydi.

Yong‘in natijasida ikkita uyning 200 kvadrat metr (100 kvadrat metr, 100 kvadrat metr) maydonda tomi, ichi va uy jihozlari yonib zararlangan. Yong‘indan uylarning 450 kvadrat metr (200 kvadrat metr va 250 kvadrat metr) maydoni saqlab qolingan.

Hodisa oqibatida tan jarohati olgan va halok bo‘lganlar yo‘q.

«Ma’lumot o‘rnida shuni aytish mumkinki, yong‘in o‘chirish qismidan yong‘in sodir bo‘lgan manzilgacha masofa taxminan 26 kilometrni tashkil etadi. Yong‘in o‘chirish avtomobillari doim har qanday vaziyatda jangovar shay holatda turadi», deyiladi vazirlik xabarida.