Yog‘li ovqatlar jigarning yog‘lanishiga va miyaning kislorod yetishmasligiga olib keladi 

London qirollik kolleji va Lozanna universiteti olimlari jigarning alkogolsiz yog‘lanishi kasalligi (JAYoK) va miya disfunksiyasi o‘rtasidagi bog‘liqlikni aniqladilar. Tadqiqot The Journal of Hepatology jurnalida chop etildi. 

Olimlar sichqonlarda tajriba o‘tkazishdi. Jumladan, sichqonlarning yarmi umumiy kaloriyasi 10 foizdan ortiq bo‘lmagan yog‘li ovqat bilan, qolgan yarmi esa 55 foizli yog‘li ovqat bilan oziqlantirildi. 16 haftadan so‘ng tadqiqotchilar bir qator kognitiv testlarni o‘tkazib, hayvonlarning jigar funksiyasini baholadilar. 

Natijada, ko‘proq yog‘ iste’mol qiladigan barcha sichqonlarda semirish belgilari paydo bo‘lgani, JAYoK, insulinga rezistentlik va miya disfunksiyasi rivojlangani aniqlandi. 

Olimlar jigarda yog‘larning to‘planishi miyani kislorod bilan ta’minlashning pasayishiga va miya to‘qimalarining yallig‘lanishiga sabab bo‘lganini aniqladi. Bu ikkala omil ham ilgari miya kasalliklarining rivojlanish xavfi bilan bog‘liq edi. JAYoK aniqlangan sichqonlarda asabiylik, depressiya belgilari kuzatildi. 

Bu tadqiqotlar birinchi marta JAYoK va miya holati yomonlashishi orasida bog‘liqlik borligini ko‘rsatib berdi.