Nogironligi bo‘lganlarga davlat xizmatlaridan foydalanishda 50 foiz chegirma qo‘llanadi

Qonunchilik palatasidagi Liberal-demokratik partiya fraksiyasi navbatdagi yig‘ilishida qator qonun loyihalari ko‘rib chiqildi.

“Davlat boji to‘g‘risida”gi qonunda “Ijtimoiy himoya yagona reyestri” axborot tizimida ro‘yxatga olingan hamda I va II guruh nogironligi bo‘lgan shaxslarga davlat xizmatlaridan foydalanishda 50 foizlik chegirma qo‘llanilishi haqidagi qoida mustahkamlanmoqda. Fraksiya a’zolari tomonidan qonun loyihasi qo‘llab-quvvatlandi.

Yig‘ilishda deputatlar “Yerosti boyliklari to‘g‘risida”gi qonun loyihasini ham ikkinchi o‘qishda muhokama qildi.

Qonun loyihasida yerosti boyliklaridan foydalanish sohasidagi maxsus vakolatli davlat organlari ro‘yxati va ular vakolat doiralari belgilanyapti. Yer qa’ri uchastkalari davlat fondiga yangi “zaxira fondi” tushunchasi kiritilib, uning mohiyati yoritib berilmoqda.

Hujjat qabul qilinishi to‘g‘ridan to‘g‘ri amal qiluvchi qonun yaratilishiga, yerosti boyliklaridan foydalanish tizimidagi ziddiyatlar bartaraf etilishiga, barcha sub’yektlarga nisbatan yer qa’ridan foydalanish tizimini bir xilda amal qilishiga xizmat qiladi. Deputatlar ushbu hujjatni ma’qulladi.

#chegirma #nogironlik