Abituriyentlar apellyatsiya arizalarini ko‘rib chiqish 7 sentabrdan boshlanadi

Bugun, 6 sentabr - apellyatsiya arizalarini qabul qilishning so‘nggi kuni. Bu haqda Davlat test markazi xabar berdi.

Foto: Kun.uz

2022 yil 28 avgust kuni oliy ta’lim muassasalari bakalavriat ta’lim yo‘nalishlariga kirish test sinovi natijasidan norozi bo‘lgan abituriyentlardan apellyatsiya arizalarini qabul qilish boshlangan edi.

31 avgust kuni talabalar o‘qishini xorijdan O‘zbekistondagi davlat OTMga ko‘chirish bo‘yicha test sinovi natijasidan norozi bo‘lgan talabgorlardan apellyatsiya arizalarini qabul qilish yo‘lga qo‘yildi.

Apellyatsiya arizalarini qabul qilish my.dtm.uz sayti orqali onlayn tarzda amalga oshirilmoqda va bugun (6 sentabr) arizalarni qabul qilish so‘nggi kuni hisoblanadi.

Apellyatsiya arizasini bergan abituriyentga uni ko‘rib chiqish sanasi va vaqti ko‘rsatilgan xabarnoma beriladi. Abituriyent xabarnomada belgilangan vaqtda shaxsini tasdiqlovchi hujjat, xabarnoma va abituriyent ruxsatnomasi bilan Davlat test markaziga kelishi lozim.

Apellyatsiya arizalarini ko‘rib chiqish 2022 yil 7 sentabr kunidan boshlanadi.

#abituriyent #apellyatsiya