Poyezd chiptalarini onlayn xarid qilganlarga bonus ballari beriladi

«O‘zbekiston temir yo‘llari» aksiyadorlik jamiyati temiryo‘l yo‘lovchilari uchun sodiqlik dasturi ishga tushirilganini ma’lum qildi.

Endi poyezd chiptalarini onlayn xarid qilishda mijozlar bonusli ball oladi. Tegishli imkoniyat chipta.railway.uz sayti yoki mobil ilovalarda taqdim etiladi.

Bonusdan foydalanish uchun One ID tizimi orqali tizimda ro‘yxatdan o‘tish kerak - bu hisobni pasport ma’lumotlari bilan bog‘lash imkonini beradi. Keyin yo‘nalish, sana va vaqtni tanlab, standart usulda chipta sotib olish lozim. 

Yo‘l haqining 2 foizdagi ekvivalenti bonus ballarida (1 so‘m = 1 ball bo‘yicha) bonus hisobiga o‘tkaziladi. Masalan, 100 000 so‘mlik chipta sotib olgani uchun yo‘lovchiga 2000 ball beriladi. 

Yig‘ilgan ballar ma’lumotlari keyingi chiptalarni onlayn xarid qilishda ko‘rsatiladi. Mijoz yetarli miqdordagi ball to‘plaganida, ular keyingi sayohat hujjatini to‘lash uchun ishlatilishi mumkin.

Ta’kidlanishicha, «O‘zbekiston temir yo‘llari» ichki turizm xarajatlarining bir qismini qoplash dasturidagi ishtiroki doirasida sodiqlik dasturini joriy qilmoqda.