Litvada Kaliningradga tranzit uchun sanksiyalar kuchga kirdi

Litvada Yevropa ittifoqi hududiga sement, spirt va Rossiyada ishlab chiqariluvchi boshqa bir qator tovarlarni olib kirishni taqiqlash bo‘yicha qaror kuchga kirdi, cheklov Kaliningradga tranzitga ta’sir qiladi, deb xabar berdi Delfi portali. Ma’lumotni 11 iyul, dushanba kuni Vilnyusdagi Moliya vazirligi qoshidagi bojxona departamenti vakiliga tayanib, Reuters agentligi ham tasdiqladi. 

Uning so‘zlariga ko‘ra, taqiq yog‘och va sanoat maqsadidagi kimyoviy moddalarga ham tegishlidir. 

Litva Tashqi ishlar vazirligi Kaliningrad oblasti va Rossiya Federatsiyasining boshqa hududlari o‘rtasida yerusti tranziti to‘xtatilmagani yoki to‘sib qo‘yilmaganini ta’kidladi. «Yevroittifoq sanksiyalariga taalluqli bo‘lmagan yo‘lovchilar va yuklarning tranziti davom etmoqda. Litva ushbu tranzitga hech qanday bir tomonlama, individual yoki qo‘shimcha cheklovlar kiritmagan», - deyiladi TIV xabarida. 

Tsement, spirt va boshqa mahsulotlarni olib kirish va tashishni taqiqlash Rossiyaning «bu tovarlardan katta daromad olishi va shu sababli Ukrainadagi vaziyatni beqarorlashtiruvchi harakatlar sodir etishi mumkinligi» bilan izohlangan. Ayrim istisnolar faqat kaliy xlorid va tarkibida azot, fosfor va kaliy bo‘lgan mineral yoki kimyoviy o‘g‘itlar uchun ko‘zda tutilgan, deya ta’kidlaydi Delfi portali. 

Cheklovlarning navbatdagi kengayishi 10 avgustda yuz berishi kutilmoqda, o‘shanda ko‘mir va boshqa qattiq qazilma yoqilg‘ilarni tashishga taqiq amal qila boshlaydi.

Yevropa ittifoqi sanksiyalarining to‘rtinchi bosqichi Rossiyaning Ukrainaga qarshi harbiy tajovuziga javob tariqasida mart oyida kiritilgan edi.