Qashqadaryoda artezian quduqda 20 soat qolib ketgan 6 yoshli bola qutqarildi

Favqulodda vaziyatlar vazirligi axborot xizmatining xabar berishicha, kecha, 12 iyun kuni soat 14:01 larda Qashqadaryo viloyati Chiroqchi tumani “Langar” MFYga qarashli Langar qishlog‘ida yashovchi fuqaro viloyat FVBga murojaat qilib, dala maydonida qazilgan, 200 diametrli suvsiz artezian quduqqa 6 yoshli o‘g‘li tushib ketganini aytib yordam so‘ragan.

Voqea joyiga zudlik bilan viloyat FVB qutqaruvchilari va tegishli xizmatlar kuch-vositalari yetib borgan. Qutqarish ishlariga FVB maxsus texnikalar, ya’ni ekskavator, greyder va boshqa texnikalar jalb etilgan.

Olib borilgan maxsus qutqarish operatsiyasi natijasida bola qariyb bir sutkada, bugun soat 10:25 da qutqarib olingan. Ayni vaqtda bolaning ahvoli yaxshi. Malakali tibbiy xizmat ko‘rsatish uchun tez tibbiy yordam xodimlariga topshirilgan.