O‘zbekiston | 08:29 / 10.06.2022
6918
2 daqiqa o‘qiladi

Hukumat yana 2 ta davlat xizmati bo‘yicha ma’muriy reglamentni tasdiqladi

Hukumat qarori bilan yana 2 ta davlat xizmati bo‘yicha ma’muriy reglamentlar tasdiqlandi. Bu haqda “Huquqiy axborot” kanali xabar bermoqda.

Foto: Davlat xizmatlari markazi

Ulardan birinchisi - bolalarni ularning sog‘lig‘iga zarar yetkazuvchi axborotdan himoya qilish sohasidagi ekspertlarni akkreditatsiya qilish bo‘yicha.

Reglamentga ko‘ra, ariza beruvchi DXMga bevosita yoki Yagona interaktiv davlat xizmatlari portali (YaIDXP (https://my.gov.uz/uz)) orqali elektron murojaat qiladi.

Ariza beruvchilar oliy ma’lumotga, pedagogika, yoshga oid psixologiya va fiziologiya, bolalar psixiatriyasi sohalarida bilimlarga (diplom yoki sertifikatga) ega bo‘lishi kerak.

So‘rovnoma to‘ldirilib, 7 ish kunida o‘rganib chiqiladi. Ariza beruvchini akkreditatsiya qilish to‘g‘risida qaror qabul qilingach, talabgor 1 kun ichida akkreditatsiyadan o‘tkaziladi. Ekspert akkreditatsiya qilinganligi to‘g‘risida guvohnoma 5 yil muddatga beriladi.

Ikkinchisi - davlat organlari va tashkilotlari axborot xizmatlari rahbarlarini attestatsiyadan o‘tkazish bo‘yicha.

Reglamentga ko‘ra, ariza beruvchi buning uchun DXMga bevosita yoki YaIDXP orqali elektron murojaat qiladi.

So‘rovnoma to‘ldiriladi hamda vakolatli organ (prezident administratsiyasi huzuridagi Axborot va ommaviy kommunikatsiyalar agentligi) 15 ish kunida ariza beruvchini attestatsiyaga qo‘yish yoki qo‘yilmasligi to‘g‘risida qaror qabul qiladi. Vakolatli organ attestatsiya guruhi shakllanishiga qarab talabgorlarni attestatsiyadan o‘tkazadi (5–10 ta savoldan iborat og‘zaki suhbat). 

Attestatsiyada qatnashishdan chetlashtirilgan talabgor 6 oy davomida keyingi attestatsiyalarga qo‘yilmaydi. Davlat organlari va tashkilotlari axborot xizmatlari rahbarlari har 3 yilda attestatsiyadan o‘tadi.

Mazkur davlat xizmatlari ko‘rsatilgani uchun yig‘im undirilmaydi.

Mavzuga oid