Qarshida xavfsizlik kamarini taqmaganlik uchun belgilangan jarimadan norozi bo‘lib yo‘lni to‘sgan haydovchilar jazolandi

2022 yil 26 may kuni soat 14:00 larda Qarshi shahridagi Islom Karimov ko‘chasida taksi haydovchilari xavfsizlik kamarini taqmaganlik uchun belgilangan jarimadan norozi bo‘lib yo‘lni to‘sgandi.

O‘shanda holat yuzasidan Qarshi shahar IIO FMB xodimlari tomonidan surishtiruv harakatlari olib borilgani va jamoat tartibini buzgan haydovchilarni aniqlash choralari ko‘rilgani xabar qilingandi.

IIV matbuot kotibi Shohruh G‘iyosovning ma’lum qilishicha, Ichki ishlar organlari tomonidan holat o‘rganilganda, Qarshidagi ko‘chani to‘sib qo‘yganlar xususiy korxonada ro‘yxatdan o‘tib, yo‘lovchi tashish bilan shug‘ullanayotgan 3 nafar haydovchi ekani ma’lum bo‘lgan.

Mazkur holat bo‘yicha ma’muriy ish hujjatlari JIB Qarshi shahar sudiga yuborilgan. Sudning qarori bilan huquqbuzarlarning har biriga nisbatan MJtKning 201-moddasi 1-qismi (jamoat tartibini buzish) bilan 10 sutkadan qamoq jazosi tayinlangan.

Bundan tashqari, yo‘lni to‘sib qo‘yishda qatnashib, jamoat tartibini buzgan 12 nafar haydovchi ogohlantirilgan.