Toyota Shanhaydagi karantin sababli Yaponiyadagi sakkizta zavodida ishni to‘xtatadi

Toyota Motor Corp. Xitoyning Shanhay shahridagi lokdaun oqibatida ehtiyot qismlarini yetkazib berish bilan bog‘liq muammolar yuzaga kelgani tufayli may oyida Yaponiyadagi sakkizta zavodda 14 ta liniyani olti kungacha to‘xtatib qo‘yadi, deb yozadi Yonhap yapon avtokonserniga tayanib.

Foto: Shutterstock

Toyota may oyi uchun ishlab chiqarish rejasini 750 000 ta avtomobildan 700 000 tagacha qisqartirdi.

Zavodlarda ish 16 maydan 21 mayga qadar to‘xtatiladi, deya aniqlik kiritgan avtokonsern.

Mart oyida Toyota kuchli zilzila tufayli barcha zavodlarida ishni to‘xtatib qo‘ygan edi, o‘shanda yer silkinishi ehtiyot qismlari taqchilligiga olib keldi.

Avvalroq Toyota mart oyidagi ishlab chiqarish rejalarini 50 000 ta avtomobilga, keyin esa aprel oyi uchun 150 000 ta avtomobilga qisqartirdi, shuningdek, ishlab chiqarishning may va iyun oylaridagi maqsadli ko‘rsatkichlarga nisbatan kamayishi ehtimoli haqida ogohlantirdi.

Xitoyda COVID-19 uchun «nol bardoshlik» siyosati mavjud. Bu virus tarqalishini lokdaunlar va kasallikni yuqtirib olgan fuqarolar bilan aloqada bo‘lganlar uchun majburiy karantin orqali cheklashni anglatadi.

Xususan, Shanhayda millionlab aholi bir oydan ko‘proq vaqt davomida izolyatsiya rejimida bo‘lib turibdi. Shanhaydan tashqari, Xitoyning boshqa o‘nlab shaharlari to‘liq yoki qisman lokdaunda. Bunday siyosat mahalliy va xalqaro miqyosda iqtisodiy yo‘qotishlarga olib keladi.

Cheklovlar ba’zi korxonalarning, shu jumladan Semiconductor Manufacturing International Corp. (SMIC) va Hua Hong Semiconductor yarimo‘tkazgich ishlab chiqaruvchilarining to‘liq yoki qisman yopilishiga olib keldi.

#Toyota #Shanhay