Qashqadaryoda maktab hovlisidagi 7 tup qayrag‘och daraxti noqonuniy kesib tashlandi

Qashqadaryo viloyati Ekologiya va atrof-muhitni muhofaza qilish boshqarmasi, IIB hamda Milliy gvardiya xodimlari bilan hamkorlikda G‘uzor tumanida ekologik nazorat reyd tadbirlari o‘tkazilgan.

Nazorat tadbiri davomida G‘uzor tuman “Yangiobod” MFY hududida joylashgan 23-sonli umumiy o‘rta ta’lim maktabi hududida daraxtlar sanoqdan o‘tkazilganda u yerda turli xil diametrdagi 7 dona qayrag‘och daraxti kesilgani aniqlangan.

Viloyat ekologiya boshqarmasi axborot xizmatining Kun.uz’ga ma’lum qilishicha, daraxtlar 23-maktab mutasaddilari tomonidan kesilgan.

Qayd etilishicha, holat yuzasidan huquqbuzarlarga nisbatan Ma’muriy javobgarlik to‘g‘risidagi kodeksning 79-moddasi 1-qismi bilan ma’muriy bayonnoma rasmiylashtirilgan. Ularga 2 million 700 ming so‘m jarima hamda 5 million 920 ming so‘m zarar qo‘llangan.

Eslatib o‘tamiz, avvalroq Qarshi davlat universiteti hududida 38 tup daraxt noqonuniy kesilgan. Shuningdek, Andijonda tug‘uruqxona oldidagi 12 tup qimmatbaho daraxt kesib tashlangan. Bundan tashqari, Yunusobod tumanidagi Amir Temur va Chinobod ko‘chalari kesishmasida ekilgan eldor qarag‘aylari kechki payt noma’lum shaxslar tomonidan kesib ketilgan. Andijon va Toshkentdagi holatlar yuzasidan jinoyat ishlari qo‘zg‘atilgan.

Prezidentning 30 dekabrdagi farmoni bilan, O‘zbekiston hududida daraxtlarni kesishga moratoriy muddatsiz davrga uzaytirilgan, tartibni buzganlik uchun jarimalar 5 barobarga oshirilgan, yetkazilgan zarar 2 barobar qilib undirilishi belgilangan edi. Farmonda noqonuniy daraxt kesish holatlarini foto va videotasvirga olib jo‘natganlarga pul to‘lanishi ham ko‘zda tutilgan. Shunga qaramasdan, joylarda hamon noqonuniy daraxt kesish holatlari to‘xtamayapti.