O‘zbekiston aholi soni o‘sishi bo‘yicha sobiq ittifoq mamlakatlari orasida ikkinchi o‘rinni egalladi

SSSR tarqalib ketganidan so‘ng o‘tgan 30 yil davomida aholi soni o‘sishi bo‘yicha eng yuqori ko‘rsatkich Tojikistonda qayd etildi, deb yozadi «Strana» nashri.

Ma’lumot berilishicha, bu davr mobaynida Tojikiston aholisi 76,6 foizga ko‘paygan.

Eng yuqori to‘rtlikdan Markaziy Osiyo mamlakatlari o‘rin olgan: O‘zbekiston (63,4 foiz), Turkmaniston (59,2 foiz) va Qirg‘iziston (47,7 foiz).

Shuningdek, Ozarboyjon (40 foiz) va Qozog‘istonda (14 foiz) ham aholi soni o‘sishi kuzatilgan.

Eng kam tug‘ilish ko‘rsatkichlari Boltiqbo‘yi mamlakatlarida qayd etilgan. O‘tgan davr mobaynida Latviyada aholi 28,3 foizga, Litvada 24,5 foizga kamaygan.

Ulardan keyingi o‘rinlarda Gruziya (-23,2 foiz), Ukraina (-20 foiz), Armaniston (-15,5 foiz), Estoniya (-14,7 foiz), Moldova (-12 foiz), Belarus (-7,8 foiz) va Rossiya (-2,9 foiz) joylashgan.