1 martdan boshlab xo‘jalik jamiyatlari ommaviy va ommaviy bo‘lmagan jamiyatlarga tasniflanadi

Prezidentning “Korporativ munosabatlarning huquqiy asoslarini yanada takomillashtirish chora-tadbirlari haqida”gi qarori loyihasi e'lon qilindi.

Fuqarolarning xo‘jalik jamiyatlari haqida aniq va to‘laqonli ma'lumotlarni olish, aksiyalarni xarid qilishda qulayliklar yaratish uchun Adliya vazirligi, Moliya vazirligi hamda Davlat aktivlarini boshqarish agentligining 2022 yilning 1 martidan boshlab xo‘jalik jamiyatlarini ommaviy va ommaviy bo‘lmagan jamiyatlarga tasniflash haqidagi takliflariga rozilik beriladi.

Belgilanishicha:

• aksiyalari va boshqa qimmatli qog‘ozlari ommaviy joylashtiriladigan (ochiq obuna yo‘li bilan) yoki qimmatli qog‘ozlar to‘g‘risidagi qonunlarda belgilangan shartlar asosida ommaviy muomalada bo‘ladigan aksiyadorlik jamiyati yoki mas'uliyati cheklangan jamiyat ommaviy jamiyat;
• ommaviy jamiyat belgilariga ega bo‘lmagan aksiyadorlik jamiyati yoki mas'uliyati cheklangan jamiyat ommaviy bo‘lmagan jamiyat hisoblanadi.

2023 yil 31 dekabrga qadar xo‘jalik jamiyatlari o‘z ustavlariga ommaviy jamiyat hisoblanishi to‘g‘risida o‘zgartirish kiritish orqali qayta ro‘yxatdan o‘tkazishda davlat boji to‘lashdan ozod etiladi.

2024 yil 1 yanvarga qadar o‘z ustaviga tegishli o‘zgartirishlarni kiritmagan xo‘jalik jamiyatlari avtomatik ravishda ommaviy bo‘lmagan jamiyat deb hisoblanadi.