Yevropada 5-11 yoshli bolalarga mo‘ljallangan Pfizer vaksinasidan foydalanish tavsiya qilindi

Yevropa dori vositalari agentligi (EMA) Pfizer-BioNTech kompaniyalarining koronavirusga qarshi 5-11 yoshli bolalarga mo‘ljallangan vaksinasidan foydalanishni tavsiya etdi.

“EMA dori vositalari qo‘mitasi 5-11 yoshdagi bolalarga mo‘ljallangan Comirnaty vaksinasidan foydalanishni tavsiya qildi”, — deyiladi EMA xabarnomasida.

Qayd etilishicha, bu yosh toifasidagi bolalar uchun vaksina dozasi 10 mikrogrammni tashkil etadi. U ham uch haftalik tanaffus bilan ikki marta kiritiladi.

Yevropa regulyatorining ma'lumot berishicha, bolalarda o‘tkazilgan klinik sinovlar davomida vaksina 90,7 foiz samaradorlik ko‘rsatgan. Sinovlarda 5 yoshdan 11 yoshgacha bo‘lgan 2 ming nafarga yaqin bola qatnashgan. 

Endi EMA dori vositalari qo‘mitasi o‘z tavsiyalarini yakuniy qaror chiqarish uchun Yevropa komissiyasiga jo‘natadi.