Voyaga yetmagan jabrlanuvchi yoki guvohni so‘roq qilish davomiyligi 4 soatdan oshmasligi belgilanadi

Qonun loyihasi bilan Jinoyat va Jinoyat-protsessual kodekslarga o‘zgartish va qo‘shimchalar kiritish taklif etilyapti. Jinoyat qonunchiligida voyaga yetmaganlarga nisbatan insonparvarlikni kuchaytirish maqsadida ularni jinoiy javobgarlikka tortish yoshini o‘n uch yoshdan o‘n to‘rt yoshga ko‘tarish, voyaga yetmaganlarning jinsiy daxlsizligiga qarshi jinoyatlar, xususan, Jinoyat kodeksining 128- va 129-moddasi sanksiyalarini kuchaytirish nazarda tutilmoqda.

Loyihaga voyaga yetmagan jabrlanuvchi yoki guvohni so‘roq qilishning umumiy davomiyligi kun davomida to‘rt soatdan oshmasligini belgilash, voyaga yetmagan jabrlanuvchi, guvoh, gumon qilinuvchi yoki ayblanuvchini so‘roq qilishda voyaga yetmagan shaxsning yoki uning qonuniy vakilining iltimosiga ko‘ra psixolog ishtirok etishini ta'minlashga qaratilgan normalar kiritilmoqda.

Qonun loyihasi deputatlar tomonidan birinchi o‘qishda qabul qilindi.