To‘rt viloyatda bittadan tumanda yangi hokim ish boshladi

Buxoro viloyati hokimi Botir Zaripov ishtirokida G‘ijduvon tumanida o‘tkazilgan sessiyada Murodjon Umarov tuman hokimligidan ozod etildi.

Muqaddam viloyat hokimi o‘rinbosari lavozimida ishlagan Umarov 2016 yilda G‘ijduvon tumani hokimligiga tayinlangandi.

Uning o‘rnida 2018 yildan buyon Buxoro viloyati davlat soliq boshqarmasi boshlig‘i lavozimida ishlab kelgan Sherzod Ashurov ish boshladi.

Sirdaryo viloyati hokimi G‘ofurjon Mirzayev ishtirokida Guliston tumanida o‘tkazilgan sessiyada Shavkat G‘ofurov tuman hokimligidan olindi.

G‘ofurov 2018 yil 18 oktyabrdan buyon Guliston tumanini boshqarib kelayotgandi. U bilan birga to‘rt sektor rahbari - prokuror, IIB va DSI boshliqlari ham ishdan ketgan va ularning o‘rniga yangilari tayinlangan.

Endilikda tumanga 2012 yildan buyon Tovar-xomashyo birjasi Sirdaryo viloyati filiali direktori lavozimida ishlab kelgan Saydimqul Begimqulov rahbarlik qiladi.

Xorazm viloyati hokimi Farhod Ermanov ishtirokida Xiva tumanida o‘tkazilgan sessiyada Ozod Matyoqubov tuman hokimi lavozimidan ozod etildi.

Muqaddam sobiq Qishloq va suv xo‘jaligi vazirligida ishlagan Matyoqubov 2017 yil yozidan buyon Xiva hokimi edi.

Uning o‘rniga viloyat bandlik bosh boshqarmasi boshlig‘i vazifasida ishlab kelgan Hurmat Matrasulov yangi hokim etib tayinlandi.

Samarqand viloyati hokimi Erkinjon Turdimov ishtirokidagi sessiyada Payariq tumanida to‘rtlik ishdan olindi.

2019 yildan buyon tumanga rahbarlik qilib kelgan Dilshod Musinov hamda tuman prokurori, tuman bosh militsioner va tuman bosh soliqchisi ishdan ketgan.

Samarqand viloyati qishloq xo‘jaligi boshqarmasi boshlig‘i vazifasida ishlab kelgan Zafar Ergashev Payariq tumani hokimi etib tasdiqlandi.