Janubiy Afrikada 10 egiz farzandni dunyoga keltirgan ayolni topa olishmayapti

Janubiy Afrika Respublikasida birdaniga 10 farzandni dunyoga keltirgan ayol haqidagi xabar butun dunyoga tarqalgandan keyin hukumat ayolni qidirishga tushib ketdi va hozircha buning uddasidan chiqa olmayapti.

Avvalroq rekord sonda egiz farzand tug‘gan ayol haqidagi xabar OAVda va ijtimoiy tarmoqlarda tarqaldi. Ayol birdaniga 7 o‘g‘il va 3 qizni dunyoga keltirib, rekord o‘rnatgani ma'lum qilingandi. Biroq hukumat hozircha ayolni ham, chaqaloqlarni ham topa olmayapti.

“Hukumat OAV va ijtimoiy tarmoqlarda janubiy afrikalik ayol 10 farzand dunyoga keltirgani va jahon rekordini o‘rnatgani haqidagi xabarga e'tibor qaratdi. Chaqaloqlarni Gauteng provinsiyasida yashovchi Goziam Tamara Sitxol dunyoga keltirgani aytilmoqda. Biroq hukumat mamlakat tibbiy muassasalarida bunday tug‘uruq holati qayd qilinganini tasdiqlay olmaydi”, deb aytgan hukumatning jamoatchilik bilan aloqalar bo‘yicha vakili Fumla Uilyams.

Ta'kidlanishicha, ayol va uning turmush o‘rtog‘i turli urf-odatlar sababli panada qolayotgan bo‘lishi mumkin.

Hozirda juftlikni qidirish ishlari davom etmoqda.

Mahalliy shifokorlar ham hozircha bu xabar bo‘yicha bayonot berishmagan. “Agar ushbu tug‘uruq o‘tgan shifoxona xodimlari uni tasdiqlashsa, bu jahon rekordi bo‘ladi va Ginness rekordlar kitobida qayd qilinadi”, deb ta'kidlab o‘tgan mahalliy radiostansiya SABC.

Hozirda bu borada Ginness rekordi joriy may oyida birdaniga 9 farzandni dunyoga keltirgan malilik Halima Sissega tegishli.