Inson salomatligi uchun xavfli deb topilgan sariyog‘ importiga taqiq qo‘yildi

«O‘zstandart» agentligi tomonidan inson salomatligi uchun xavf tug‘diradigan sariyog‘ mahsuloti importiga cheklov joriy etildi.

Ma'lum qilinishicha, «O‘zstandart» agentligi huzuridagi departament tomonidan Toshkent shahridagi savdo majmualarida sotilayotgan «Lurpak unsalted butter» sariyog‘i sifat talablariga javob bermagan.

Ushbu mahsulot Daniya davlatida «ARIA FOODS AMBA» korxonasi tomonidan 2020 yil 3 iyulda ishlab chiqarilgan. «O‘zstandart» agentligi huzuridagi departament tomonidan «Lurpak unsalted butter» – 82 foizli sariyog‘ mahsuloti «Sut va sut mahsulotlari xavfsizligi to‘g‘risida»gi umumiy texnik reglament talablariga javob bermadi, deb topilgan.

Mahsulot tarkibida iste'mol uchun yaroqsiz bo‘lgan o‘simlik yog‘i aniqlangan.

Xabarlarga ko‘ra, «Lurpak unsalted butter» sariyog‘ mahsuloti amaldagi texnik reglament talablariga muvofiq kelmagani sababli importini cheklash yuzasidan Bojxona qo‘mitasiga ma'lumot kiritilgan.

Avvalroq, «Rosselxoznadzor» 2021 yil 14 apreldan boshlab Rossiyaga O‘zbekistonning 17ta korxonasiga «pomidor jigarrang bujmayish virusi»dan xoli deb topilgani bois pomidor olib kirishga ruxsat bergani ma'lum qilingandi.

#O‘zstandart #sariyog‘