Rossiya O‘zbekistonga 10ta metro poyezdi yetkazib beradi

«Innoprom» sanoat ko‘rgazmasi doirasida VEB.RF davlat korporatsiyasi va Toshkent metropoliteni o‘rtasida Rossiyaning «Transmashxolding» birlashmasi tarkibiga kiruvchi «Metrovagonmash» tomonidan ishlab chiqarilgan 10ta zamonaviy metro poyezdini yetkazib berish bo‘yicha kredit shartnomasi imzolandi.

Kredit liniyasi 12 yil muddatga olingan bo‘lib, 30,4 million yevroni tashkil etadi.

Shartnoma «Toshkent metropoliteni» unitar korxonasi rahbari Oybek Xudoyqulov va VEB.RF raisining o‘rinbosari Daniil Algulyan o‘rtasida imzolangan.

«Ayni paytda O‘zbekistonda jamoat transporti tizimini rekonstruksiya qilish bo‘yicha keng ko‘lamli dastur amalga oshirilmoqda. Rossiyada ishlab chiqarilgan zamonaviy poyezdlar allaqachon Toshkent metropolitenida harakatlanmoqda. Xususan, 2019 yilning kuzida VEB.RF ko‘magi bilan Toshkentga dastlabki beshta poyezd yetkazib berilgan. Ayni paytda VEB.RF Toshkent shahar hokimligi bilan infratuzilmani yaratish va rivojlantirishga qaratilgan bir qator loyihalarni muhokama qilmoqda», — dedi Daniil Algulyan.

Avvalroq Rossiyaning «Transmashxolding» kompaniyasi Toshkent metrosi uchun 81-765.5/766.5/767.5 modelidagi 5ta poyezdni jo‘natgani xabar qilingandi.

Toshkent metrosi va «Metrovagonmash»ni uzoq yillik o‘zaro manfaatli hamkorlik birlashtiradi. Korxona tomonidan Toshkent metrosi uchun 1977 yilda 20dan ko‘proq poyezd yetkazilgan.