Yozuvchilar uyushmasi: Adiblar xiyobonidagi gips haykallar olib ketilgan

Joriy yil fevral oyining boshida ijtimoiy tarmoqlarda Toshkentdagi Adiblar xiyoboni hududida gips haykallar qarovsiz holatda yotgani haqida xabarlar va suratlar tarqalgan edi. Bu jamoatchilikda salbiy tasavvur uyg‘otib, ko‘pchilikning tanqidiga sabab bo‘ldi.

Yozuvchilar uyushmasi axborot xizmati rahbari Fozil Farhodning ma'lum qilishicha, xiyobondagi adiblarning haykallari bronzaga o‘tkazilgach, gipsdan yasalgan variantlari olib chiqib ketish uchun bog‘ning bir chetiga to‘plab qo‘yilgan bo‘lgan.

2021 yil 11 fevral kuni uyushma so‘roviga ko‘ra O‘zbekiston Badiiy akademiyasi tomonidan bu gips haykallar olib ketilgan.

Badiiy akademiya rasmiylarining ma'lum qilishicha, Kamoliddin Behzod nomidagi Milliy rassomlik va dizayn institutining Haykaltaroshlik yo‘nalishi talabalari mazkur haykallardan ko‘rgazmali vosita sifatida foydalanadi.

Eslatib o‘tamiz, Toshkentda Adiblar xiyoboni 2020 yil may oyi oxirlarida ochilgandi. Prezidentning 2017 yil 18 aprelda tegishli qarori qabul qilinib, xiyobonning me'moriy-g‘oyaviy loyihasi ishlab chiqilgan. Shundan so‘ng 8 gektardan ziyod maydonda Adiblar xiyobonining yaxlit me'moriy ansambli yaratildi. Xiyobonni g‘oyaviy-badiiy jihatdan yanada boyitish maqsadida Bobur, Ogahiy, Berdaq, Muqimiy, Furqat, Behbudiy, Avloniy, Cho‘lpon, Qodiriy, To‘lepbergen Qayipbergenov, Ibroyim Yusupov, Aleksandr Faynberg singari atoqli namoyandalar xotirasiga bag‘ishlangan yangi yodgorlik majmualari barpo etildi.

#haykal #Yozuvchilar uyushmasi #Adiblar xiyoboni