«Paxtakor» va «Nasaf» o‘rtasidagi O‘zbekiston Superkubogi Samarqandda o‘tkaziladi

PFL «Paxtakor» va «Nasaf» o‘rtasidagi O‘zbekiston Superkubogi uchrashuvi Samarqandda o‘tkazilishini rasman tasdiqladi.

«2021 yilgi mavsumda O‘zbekiston Professional futbol ligasi tomonidan o‘tkaziladigan musobaqalar reglamenti»ning 22.3-bandiga asosan shu yilning 6 mart sanasida O‘zbekiston Superkubogi uchun uchrashuv o‘tkaziladi.

Unda mamlakat chempioni sifatida «Paxtakor» va vitse-chempion sifatida «Nasaf» klublari o‘zaro saf tortadi. Bellashuv 16:00da start oladi.

Mazkur band shartlaridan kelib chiqib, Superkubok o‘yini uchun Samarqand shahri tanlab olindi. Shahargacha yetib borish sharoiti Toshkent va Qashqadaryo klubi muxlislari uchun nisbatan teng ekani inobatga olindi. Reglamentdan kelib chiqib, mazkur bellashuvda «Paxtakor» futbol klubi rasmiy mezbon hisoblanadi.

O‘zbekiston Professional futbol ligasi Superkubok o‘yinini tashkil etishda ko‘rsatayotgan yordami uchun Samarqand viloyati hokimiyati hamda «Dinamo» futbol klubi rahbariyatiga minnatdorchilik bildiradi», - deyiladi xabarda.

Avvalroq, Tribuna.uz sayti PFL ishchi guruhi seshanba kuni Samarqandda bo‘lib, «Dinamo» stadionini nazoratdan o‘tkazgani va O‘zbekiston Superkubogi bahsi ko‘hna shaharda o‘tkazilishi haqida xabar bergandi.

#O‘zbekiston Superkubogi