Milliy olimpiya qo‘mitasi huzurida Ilmiy-tadqiqot va innovatsiya markazi tashkil etildi

Vazirlar Mahkamasi qarori bilan O‘zbekiston Milliy olimpiya qo‘mitasi huzurida Ilmiy-tadqiqot va innovatsiya markazi tashkil etildi.

Qarorda belgilanishicha, Markaz O‘zbekiston Respublikasi sportchilarini olimpiya va paralimpiya o‘yinlarida hamda boshqa nufuzli xalqaro musobaqalarda muvaffaqiyatli ishtirok etishi uchun tayyorlashga ko‘maklashuvchi, ularning sport mahoratini oshirish va jismoniy holatini qayta tiklash ishlarini ilmiy-uslubiy va axborot-tahliliy hamda ilmiy-uslubiy kuzatib borish faoliyatini amalga oshiruvchi ixtisoslashtirilgan ilmiy-tadqiqot muassasasi hisoblanadi.

Quyidagilar Markazning asosiy vazifalari etib belgilandi:

O‘zbekiston Respublikasi sport terma jamoalarining musobaqa va mashg‘ulotlarni rejalashtirishni hisobga olgan holda sportchining individual sport jismoniy yuklamasini tekshirish va maqbullashtirish; 

sportning tegishli turi bo‘yicha respublika sport federatsiya (uyushma)lari sportchilarining xalqaro musobaqalarda qatnashishga psixologik tayyorgarligini, shuningdek, zarur psixologik korreksiyasini ta'minlash;

respublika sport terma jamoalari sportchilarining mashg‘ulot yuklamalarini tahlil qilish, kutilayotgan sport natijalariga erishishga qaratilgan sport tayyorgarligini rejalashtirish va dasturlash; sport terma jamoalari a'zolarini sport musobaqalariga, xususan olimpiya o‘yinlariga tayyorgarlik ko‘rish amaliyotiga mashq va musobaqalar samaradorligi hamda sportchilarda sport mahoratining o‘sishiga xizmat qiluvchi zamonaviy innovatsiya texnologiyalari va uslublarini joriy etish; 

sport tayyorgarligi davomida sportchilarning funksional holatini uzluksiz monitoring qilish hamda sport musobaqalarida ishtirok etish natijalarini jamoaviy va shaxsiy jihatdan baholash tizimini yaratish bo‘yicha yagona yondashuvni ishlab chiqish; 

sportchilarning texnik-taktik, psixofiziologik holatini va ularning jismoniy tayyorgarligini o‘rganish, sport sohasida fundamental va amaliy tadqiqotlar olib borish; 

sport sohasidagi dolzarb ilmiy muammolarga bag‘ishlangan ilmiy, ilmiy-amaliy konferensiyalar, seminarlar, yig‘ilishlar tashkil etish.

MOQ