Foto: Buxoro Arki maydonidagi ommaviy sog‘lomlashtirish tadbirida 10 ming kishi qatnashdi

O‘zbekistonda 6 iyul – Olimpiya kuniga tayyorgarlik boshlandi.

Milliy olimpiya qo‘mitasidan ma'lum qilishlaricha, respublikaning turli hududlarida bu kunga bag‘ishlangan ommaviy sport tadbirlari boshlab yuborildi. Jumladan, bugun Buxorodagi Ark qo‘rg‘onida Olimpiya kuniga bag‘ishlangan ommaviy sog‘lomlashtirish tadbiri o‘tkazildi.

Yoshlarni jismoniy tarbiya va sportga keng jalb qilish, olimpiya harakatini rivojlantirish, olimpizmning ezgu g‘oyalarini ilgari surish maqsadida tashkil etilayotgan Buxorodagi tadbirda o‘n ming kishi ishtirok etdi.

Ark qo‘rg‘onida jam bo‘lgan qatnashchilar olimpizm timsolini ifodalovchi 5 xil rangdagi futbolkalarda Olimpiada halqasini shakllantirdilar. Tadbirda, shuningdek, xalqaro musobaqalarda g‘olib va sovrindor bo‘lgan buxorolik sportchilar ham ishtirok etishdi.

Sahnada sportning badiiy gimnastika, boks, taekvondo turlari bilan shug‘ullanadigan sportchilar ma'lum shakl asosida harakatlanishdi. Sahna atrofi va halqa uzra Xalqaro Olimpiya Qo‘mitasi va O‘zbekiston bayroqlari joylashtirildi.

Ma'lumot uchun, bu yilgi Olimpiya kuni ilk marotaba butun O‘zbekiston bo‘ylab umummilliy xalq sayli tarzida nishonlanadi. Bundan ko‘zlangan maqsad – aholining turli qatlamlarini, ayniqsa, yoshlarni shunday ezgu g‘oya ostida birlashtirish, ularni sportga jalb etishdir.

Xalqaro Olimpiya kunining asosiy tadbirlari 5-6 iyul sanasiga belgilangan bo‘lsa, Toshkentdagi bosh tantana 6 iyul kuni «Humo arena» muz saroyida katta gala-konsert tarzida o‘tkaziladi