O‘zbekistonda sir saqlanadigan ma'lumotlar ro‘yxati qayta ko‘rib chiqiladi

O‘zbekistonda foydalanishga cheklovlar mavjud ma'lumotlar ro‘yxati qayta ko‘rib chiqiladi. Bu haqda 2017–2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid Davlat dasturi loyihasida aytilgan.

Hujjat bilan Vazirlar Mahkamasi qarori loyihasi ishlab chiqiladi. Loyihada:

investitsiya va yuqori texnologiyalarni jalb etishga to‘siq bo‘layotgan cheklovlarni bekor qilish;

neft va gaz tarmog‘iga oid yopiq ma'lumotlarni xatlovdan o‘tkazib, ulardan ochiq foydalanish imkonini yaratish;

qonun hujjatlariga muvofiq sir saqlanadigan ma'lumotlar ro‘yxatini, tegishli tarmoqlar ro‘yxatlarini qayta ko‘rib chiqish;

geodeziya va kartografiya sohasida davlat sirlarini saqlash va ochiq foydalaniladigan kartografik materiallarni yaratish tartibini ishlab chiqish nazarda tutiladi.

Bajarish muddati - 2019 yil 1 aprel, ijro uchun mas'ullar - Vazirlar Mahkamasi, Davlat geologiya va mineral resurslar qo‘mitasi, “Davergeodezkadastr” qo‘mitasi, DXX, Mudofaa vazirligi, FVV, “O‘zbekneftgaz” AJ, Investitsiyalar bo‘yicha davlat qo‘mitasi.