Rahbarlarga innovatsion menejment bo‘yicha saboq beriladi

2018 yil fevraldan boshlab O‘zbekiston Respublikasi Prezidenti huzuridagi Davlat boshqaruv akademiyasi bazasida innovatsion menejment bo‘yicha qisqa muddatli maxsus kurslar tashkil etilish ma'lum bo‘ldi. Bu haqda Vazirlar Mahkamasining «Ilmiy-innovatsion ishlanma va texnologiyalarni ishlab chiqarishga tatbiq etishning samarali mexanizmlarini yaratish chora-tadbirlari to‘g‘risida»gi qarorida aytiladi.

Ma'lum qilinishicha, joriy yilning ikkinchi oyidan boshlab, ilmiy va oliy ta'lim muassasalari, xo‘jalik boshqaruvi organlari va yirik davlat korxonalari mas'ul rahbarlari va mutaxassislari uchun innovatsion menejment bo‘yicha qisqa muddatli kurslar tashkil etilishi belgilangan.

Innovatsion menejment – bu innovatsion jarayonlar, innovatsion faoliyat, bu faoliyat bilan band bo‘lgan tashkiliy tuzilmalar va ularning xodimlarini boshqarish tamoyillari, usullari va shakllarning majmuasidir.