"Mahalla" tizimida yangi lavozimlar joriy etiladi

28 mart kuni Toshkent shahar hokimiyatida O‘zbekiston Respublikasi Prezidenti Shavkat Mirziyoyevning 2017 yil 3 fevraldagi "Mahalla institutini yanada takomillashtirish chora-tadbirlari to‘g‘risida"gi farmoni bo‘yicha poytaxtda amalga oshirilayotgan ishlardan aholini boxabar qilishga bag‘ishlangan matbuot anjumani bo‘lib o‘tdi. Unda "Mahalla" xayriya jamoat fondi Toshkent shahar bo‘limi sohada amalga oshirilayotgan ishlar bo‘yicha hisobot berdi. 

Mahalla tizimidagi islohotlarni yangi bosqichga ko‘tarishda muhim omil bo‘lib xizmat qilayotgan mazkur farmon asosida fuqarolarning o‘zini o‘zi boshqarish organlari faoliyatini muvofiqlashtirish bo‘yicha respublika kengashida tashkiliy ishlar va uslubiy mavzular bo‘yicha rais o‘rinbosari, shuningdek, Respublika kengashi hamda hududiy kengashlarda yoshlar ishlari, diniy-ma'rifiy masalalar, keksalar va faxriylar ishlari bo‘yicha rais o‘rinbosarlari lavozimini joriy etish nazarda tutilgan.

Shuningdek, fuqarolarning o‘zini o‘zi boshqarish organlarida jamoatchilik asosida faoliyat yuritadigan fuqarolar yig‘ini raisining o‘rinbosari – yoshlar masalalari bo‘yicha maslahatchi lavozimi joriy etiladi.

Farmon asosida joriy etilayotgan lavozimlarga vatanparvar, har jihatdan yetuk va fidoyi kadrlarni tanlab olish maqsadida joylarda saylovlar o‘tkazish rejalashtirilgan. Shu maqsadda 2017 yilning 23 fevralida Oliy Majlis Senatining "O‘zbekiston Respublikasi Oliy Majlisi Senatining fuqarolar yig‘inlarida saylovlarni o‘tkazishga ko‘maklashish bo‘yicha ishchi guruhini tuzish to‘g‘risida"gi farmoyishi qabul qilindi.