Robbi Uilyams: "Ruslar kabi bayram qil!"

Britaniyalik qo‘shiqchi Robbi Uilyams o‘zining Facebook'dagi sahifasida "Party Like A Russian" ("Ruslar kabi bayram qil") qo‘shig‘iga tasvirga olingan klipni taqdim etdi. Rolikda u hashamatli saroyda baletchi qizlar bilan raqsga tushadi. 

Xonanda butun millatning pulini o‘marib, shaxsiy kosmik stansiyasini qurgan, hech qachon tabassum qilmaydigan badavlat rus kishisi haqida kuylagan.

"Ruslar kabi bayram qil, ortiqcha gap-so‘zni to‘xtat, xuddi aqldan ozgandek raqsga tush", - deyiladi qo‘shiq matnida, hattoki bir necha ruscha so‘zlarni ham qo‘shib qo‘yadi. Ushbu kompozitsiya qo‘shiqchining yangi "Heavy Entertainment Show" albomiga kiritilgan. 

Uilyams qo‘shiqdan Rossiya prezidenti haqidagi misralarni olib tashlaganini aytdi:

"Rossiyada 147 million kishi yashaydi. Ularni xafa qilmoqchi emasman. Nima bo‘lganda ham, ularning hazil-mutoyibaga munosabati qanday ekanini bilmayman. Men hech kimning ustidan kulmadim. Qo‘shiq siyosiy jihatdan nobop bo‘lmasligi uchun undan bir necha misralarni olib tashladim", - dedi Uilyams The Sun nashriga bergan intervyusida. 

Robbi Uilyams Britaniyaning eng mashhur qo‘shiqchisi hisoblanadi. Ijrochi albomlarining dunyo miqyosida sotilishi 55 million nusxadan oshadi. Qo‘shiqchi bir necha marotaba Rossiyada bo‘lgan.