Исроил Ғарбий соҳилдаги қочқинлар лагерида 1000 дан ортиқ уйни вайрон қилди

Исроилнинг босиб олинган Ғарбий соҳилдаги қочқинлар лагерларига бир неча ой давомида уюштирган ҳужумлари 47 мингдан ортиқ фаластинликни уйини тарк этишга мажбур қилди.

Фото: Anadolu Agency

Исроил армияси 21 январдан бери босиб олинган Ғарбий соҳил шимолидаги Женин, Тулкарм ва Нур-Шамс қочқинлар лагерларида 1000 дан ортиқ уйни бутунлай вайрон қилди, дея хабар беради маҳаллий матбуот қўмиталари.

Женин қочқинлар лагери матбуот қўмитаси баёнотига кўра, «Исроил армияси ҳужум бошидан буён лагерда 600 дан ортиқ уйни бутунлай бузиб ташлаган, қолганлари шикастланган ва яшаш учун яроқсиз».

Исроилнинг Женин ва ундаги лагерда ҳарбий ҳаракатлари 159 кундан бери давом этаётгани таъкидланди. Шу вақт ичида кўплаб уйлар ёндирилди, уларнинг бир қисми ҳарбий базага айлантирилди, қазиш ва бузиш ишлари фаол давом этмоқда.

Исроилнинг Жениндаги ҳужумлари натижасида 42 фаластинлик ҳалок бўлди, ўнлаб одамлар яраланди, кўплаб инсонлар қўлга олинди. Отишма туфайли 22 мингга яқин одам ўз уйини тарк этишга мажбур бўлди.

Тулкарм матбуот қўмитаси маълумотларига кўра, Тулкарм ва Нур-Шамс қочқинлар лагерларида Исроил армияси 400 та уйни бутунлай вайрон қилган. 2573 та бино ҳам шикастланган.

Қўмитанинг хабар беришича, Исроил армияси яна 106 та бинони, жумладан, 250 дан ортиқ турар жой биноларини бузишни режалаштирмоқда.

#Исроил #Фаластин #сионизм

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.