G7 АҚШ бизнесини глобал солиқдан озод қилишга рози бўлди

Қўшма Штатлар ва бошқа G7 давлатлари АҚШ компаниялари йирик корпорациялар учун глобал минимал солиқ тўлашдан озод қилинишига келишиб олди. Бу ҳозирда G7'га раислик қилаётган Канада Молия вазирлиги томонидан 28 июн куни эълон қилинган баёнотда айтилади. Баёнотга кўра, G7 янги режаси АҚШнинг амалдаги минимал солиқ қонунларини тан олади ва халқаро солиқ тизимининг барқарорлигини оширишга қаратилган.

Бунга жавобан Вашингтон АҚШ президенти Доналд Трамп томонидан таклиф этилган солиқларни қисқартириш ва давлат харажатларини кўпайтириш бўйича «катта ажойиб» қонун лойиҳасига киритилган «солиқ қасоси» бандидан воз кечиши кутилмоқда. Ушбу ҳужжатнинг 899-моддасида «камситувчи» солиқ сиёсатига эга бўлган мамлакатларнинг жисмоний шахслари ва компаниялари учун солиқларни ошириш (тўрт йил давомида йилига +5 фоиз пункт) имконияти кўзда тутилган. Бу Иқтисодий ҳамкорлик ва тараққиёт ташкилоти (ИҲТТ) томонидан илгари суриладиган йирик корпорациялар учун минимал солиқни ўз ичига олиши мумкин.

Axios маълумотига кўра, АҚШ молия вазири Скотт Бессент аллақачон Конгрессдан Трампнинг 28 июн куни АҚШ Сенатида процессуал овоз беришдан ўтган «катта ажойиб» қонун лойиҳасидан «солиқ қасоси» бандини чиқариб ташлашни сўраган. The New York Times'га кўра, «солиқ қасоси» АҚШ бюджетига 10 йил ичида 100 миллиард доллардан кўпроқ даромад келтириши мумкин.

Германия молия вазири ва вице-канцлер Ларс Клингбайлнинг айтишича, Вашингтон ва бошқа G7 давлатлари ўртасида эришилган келишув «солиқдан бўйин товлаш ва солиқ демпингига қарши курашни давом эттириш» имконини беради.