Трамп: Путиннинг Украинадан ташқари амбициялари бўлиши мумкин

АҚШ президенти Доналд Трамп Россия президенти Владимир Путиннинг ҳудудий амбициялари Украинадан ташқарига ҳам тарқалиши мумкинлигини истисно этмаяпти. «Менимча, бу мумкин», деди у 25 июн, чоршанба куни Ҳаагада журналистнинг бу борадаги саволига жавоб берар экан.

Шу билан бирга, Трамп Путин «келишувга келишни» ва Украинага қарши урушдан чиқишни исташига ишонч билдирди, чунки «у учун бу бутунлай чалкашлик». Оқ уй раҳбарининг сўзларига кўра, яқинда Путин унга қўнғироқ қилиб, Эрон масаласида ёрдам таклиф қилган, бироқ у Путин унга Россия билан «ёрдам бергани» маъқулроқ, деб жавоб берган. «Менимча, у шунчаки адашиб қолган одам. Мен жуда ҳайронман. Ҳаммасини осонликча ҳал қиламиз деб ўйладим», деб таъкидлади Америка раҳбари.

Нега президентликка қайтганидан кейин беш ой ўтиб, Украинадаги урушни тугатиш ҳақидаги сайловолди ваъдасини бажармади, деган саволга жавоб берар экан, Трамп «Путин ўзини «жуда оғир одам эканлигини исботлади» ва Украина президенти Володимир Зеленский билан «муаммолар бўлган»ини айтди. У яна Путинга қўнғироқ қилмоқчи эканлигини қўшимча қилди, бироқ қачонлигини аниқлаштирмади.

25 июн куни Трамп Ҳаагадаги НАТО саммитидан кейин Зеленский билан учрашди. Унинг сўзларига кўра, у билан Россия ва Украина ўртасида ўт очишни тўхтатиш масаласини муҳокама қилмаган, шунчаки «унинг аҳволини» билган. «Учрашувдан билганим шуки, Зеленский бу ишни тугатишни хоҳлайди. Мен Путин билан гаплашишим керак, буни якунлай оламизми ёки йўқми, шуни. Ўтган ҳафта деярли 7 минг Украина ва Россия аскари ҳалок бўлгани ақлга сиғмайди», — деди Трамп.

Ўз навбатида, Зеленский АҚШ президенти билан Украина шаҳарларини ҳимоя қилиш учун Американинг Patriot ҳаво мудофаа тизимларини сотиб олиш ва дронларни биргаликда ишлаб чиқариш имкониятларини муҳокама қилганини айтди. Шунингдек, у Трампга Россия делегацияси билан Истанбулда олиб борилган музокаралар, асирлар ва ҳалок бўлганлар жасадини алмашиш ҳақида гапириб берди. «Биз жанг майдонидаги вазият ҳақида гаплашдик. Путин, албатта, ғалаба қозонмаяпти. Мен президентга ҳақиқатда жойларда содир бўлаётган воқеаларга оид фактларни тақдим этдим», — дея хулоса қилди Зеленский.

Ғарб ҳарбийлари ва сиёсатчилари мунтазам равишда Путин НАТОга ҳужум тайёрлаётган бўлиши мумкинлигини айтади. Уларнинг прогнозига кўра, бу 3-5 йил ичида содир бўлиши мумкин ва мақсад Болтиқбўйи мамлакатлари — Латвия, Литва ёки Эстония бўлади. Путин аллақачон ҳарбий харажатларни ялпи ички маҳсулотнинг 7 фоизигача оширган ва ҳозирда бу харажатлар давлат бюджетининг учдан бир қисмидан кўпроғини ташкил этади. Шу билан бирга, Финландия ва Болтиқбўйи мамлакатлари билан чегарадош Ленинград ҳарбий округида ҳарбий базалар, қурол-яроғ ва техника омборлари, ўн минглаб ҳарбий хизматчиларни бошқариш учун армия штаби қурилмоқда.