МРБ Эрон ядро объектларига жиддий зарар етганини эълон қилди

Марказий разведка бошқармасида мавжуд бўлган ишончли разведка маълумотлари Эроннинг ядровий дастури АҚШ ҳарбий самолётларининг яқинда берилган зарбалари туфайли жиддий зарар кўрганини тасдиқлайди. Бу ҳақда Марказий разведка бошқармаси директори Жон Рэтклиффнинг 25 июн, чоршанба куни Марказий разведка бошқармаси сайтида чоп этилган баёнотида айтилади.

Таъкидланишича, Марказий разведка бошқармаси Эроннинг бир қатор ядровий объектлари вайрон қилингани ва уларни қайта тиклаш бир неча йил давом этиши ҳақидаги хулосага келган ахборот ўз ичига «ишончли ва аниқ манба/усулдан олинган янги разведка маълумотлари»ни олади. «Марказий разведка бошқармаси қарор қабул қилувчилар ва назорат қилувчи органларни хабардор қилиш учун ишончли манбалардан қўшимча маълумот тўплашда давом этмоқда», — дейилади ҳужжатда.

Шу куни, 25 июнда CNN телеканали Америка ҳарбий разведкасининг хулосалари билан таниш бўлган етти манбага таяниб, АҚШнинг Эрондаги учта ядровий объектига яқинда берган зарбалари «бу давлат ядровий дастурининг марказий қисмларини йўқ қилмагани, балки уни бир неча ой орқага сурганини» ёзди. Шунга ўхшаш маълумот The New York Times томонидан ҳам тарқатилган.

Нашрлар манбалари, хусусан, Эроннинг бойитилган уран захиралари йўқ қилинмаганини даъво қилмоқда. Журналистларнинг суҳбатдошларидан бири, шунингдек, центрифугалар «асосан, иш ҳолатида» эканини айтди. Бошқа бир манбанинг айтишича, бойитилган уран АҚШ уларга зарба беришдан олдин ядровий иншоотлардан олиб чиқиб кетилган.

«Оқ уй бундай баҳолашни тан олади, бироқ уларга қўшилмаслигини маълум қилади», деб хабар берди CNN. Ўз навбатида АҚШ президенти Доналд Трамп ўзининг Truth Social ижтимоий тармоғида журналистларни кескин танқид қилди. «Фейк хабарларни тарқатган CNN ва New York Times тарихдаги энг муваффақиятли ҳарбий зарбалардан бирининг ролини пасайтиришга ҳаракат қилди. Эрондаги ядровий иншоотлар бутунлай вайрон бўлди!» - деб ёзган Трамп.