Жаҳон | 14:23 / 21.06.2025
2887
2 дақиқада ўқилади

Россия ва Украина ҳалок бўлган аскарлар жасадини алмашди

Россия Украина Қуролли кучларининг 1212 аскарининг жасадини Украина томонига топширди ва 27 нафар ҳалок бўлган ҳарбийнинг жасадини қайтариб олди — Россия президенти ёрдамчиси Владимир Мединский.

Фото: AP

Россия Истанбул келишувлари доирасида Украина Қуролли кучлари (УҚК)нинг 1212 нафар аскари жасадини Украинага топширди ва 27 нафар ҳалок бўлган ҳарбийнинг жасадини қайтарди. Бу ҳақда Россия Федерацияси президентининг ёрдамчиси Владимир Мединский маълум қилди.

«Истанбул келишувларига кўра ҳалок бўлган аскарларнинг жасадларини топшириш бошланди. Украина Қуролли кучларининг 1212 нафар аскарининг жасадини Украина томонига топширдик. Россия қуролли кучларининг ҳалок бўлган 27 нафар ҳарбийси бизга қайтарилди», — деди Мединский.

Унинг сўзларига кўра, фронтдаги оғир яраланган асирларнинг шошилинч «санитария алмашинуви» ҳам бошланади. «Иш шу кунларда давом этади», деди Россия президенти ёрдамчиси.

Айни пайтда, Украина ҳарбий асирлар билан ишлаш бўйича координация штабининг маълум қилишича, 1212 нафар ҳалок бўлган аскарнинг жасади Украинага қайтарилган.

Штабнинг қайд этишича, қайтарилганлар орасида Курск, Харкив, Луҳанск, Донецк, Запорижжя ва Херсон вилоятларида ҳалок бўлганлар бор.

Аввалроқ, 2 июн куни Истанбулда Чароғон саройида тинчлик музокараларининг иккинчи босқичи бўлиб ўтган эди. Томонлар гуманитар масалалар, жумладан ярадорлар, оғир касаллар ва 25 ёшгача бўлган шахслар орасидан ҳарбий асирларни алмашиш, шунингдек, 6 мингдан ортиқ ҳалок бўлганларнинг жасадларини топшириш бўйича келишувга эришди.

Мавзуга оид