Фарғонада туман МИБ бошлиғи пора билан ушланди

У суднинг ижро варақаси бўйича ижро ҳаракатларини якунлаб бериш эвазига 2 минг АҚШ доллари талаб қилган.

Фото: ДХХ

Фарғона вилоятидаги туманлардан бирининг Мажбурий ижро бюроси бошлиғи пора билан қўлга олинди, деб хабар берди ДХХ.

Қайд қилинишича, у ўз хизмат ваколатидан фойдаланган ҳолда, бўйсунувидаги давлат ижрочиси иш юритувида бўлган фуқаролик ишлари бўйича суднинг ижро варақаси бўйича жавобгарларни ушбу тумандаги хонадондан мажбурий тартибда кўчириш юзасидан ижро ҳаракатларини якунлаб бериш эвазига 2 минг АҚШ доллари талаб қилган.

3 июнь куни у талаб қилинган пул маблағидан 1200 АҚШ долларини пора сифатида олган. Давлат хавфсизлик хизмати ва Бош прокуратура ҳузуридаги Департамент ҳамкорлигида ўтказилган тезкор тадбирда, у қолган 800 АҚШ долларини олган вақтида ашёвий далиллар билан ушланган.

Ҳолат юзасидан МИБ мансабдор ходимига нисбатан Жиноят кодексининг 210-моддаси 2-қисми “в” банди билан жиноят иши қўзғатилиб, қамоқ эҳтиёт чораси қўлланди.

#Фарғона #пора #МИБ #ДХХ