АҚШ разведкаси Эроннинг ядро қуроли устида ишлаётганига оид ҳеч қандай далил топмади

АҚШ Миллий разведка хизмати Эроннинг ядровий қурол яратиш устида ишлаётгани ҳақида ҳалигача ҳеч қандай далилга эга эмас. Бу ҳақда 18 июн, чоршанба куни кечқурун MSNBC телеканалида Сенатнинг разведка бўйича махсус қўмитаси раиси ўринбосари Марк Уорнер айтиб ўтди. Демократик партия вакили Миллий разведканинг икки кун аввал сенаторлар билан бўлишган хулосаларини келтирди.

Уорнер, шунингдек, АҚШ Миллий разведкаси директори Тулси Габбард 25 март куни махсус қўмита учун ёзма баёнотида: «Эрон бомба ясаш бўйича ҳеч қандай чора кўрмади», деб айтганини эслатди. «Шу ҳафтанинг душанба куни биз разведка маълумоти ўзгармагани ҳақидаги тасдиқни олдик», дея қўшимча қилди сенатор-демократ эфирда. «Твитлар орқали ташқи сиёсат юритиш - аҳмоқона иш. Лекин бу одам шундай қиляпти», деди у, шунингдек, Трамп «барча разведка маълумотларига эътибор бермаслигини» таъкидлаб.

Март ойи охиридаги хабарида Габбард ўз идорасининг 18 АҚШ разведка бўлинмасининг Эрон бўйича хулосаларини умумлаштирган. Унинг маълумотларига кўра, «Эрон ядровий қурол яратмаяпти ва олий раҳбар Хоминаий 2003 йилда тўхтатиб қўйган ядровий қурол дастурига рухсат бермаган».