Трамп Россиянинг G8 ташкилотидан четлатилишини хато деб атади

Америка етакчиси Россиянинг «Катта Саккизликка» аъзо бўлиши Украинадаги можаронинг олдини олиши мумкин эди, деган фикрни такрорлади.

Фото: AFP

АҚШ президенти Доналд Трамп Россияни G8 форматидан чиқариш қарорини ва ташкилотнинг кейинчалик G7 форматига қайтишини хато деб атади. Оқ уй раҳбари буни Канада мезбонлик қиладиган G7 саммити арафасида айтди.

«Катта еттилик авваллари G8 эди. Барак Обама (АҚШ собиқ президенти) ва Трюдо (Канада собиқ бош вазири) исмли киши Россияни киритишни истамади. Буни хато деб айтган бўлардим, чунки менимча, агар Россия гуруҳда бўлганида ҳозир уруш бўлмасди ва агар Трамп тўрт йил олдин президент бўлганида ҳозир уруш бўлмасди», деди АҚШ президенти.

Доналд Трамп аввал ҳам Россиянинг «Катта Саккизлик»даги иштироки Украинада ҳарбий ҳаракатлар бошланишининг олдини олиши мумкинлигини айтган эди. Май ойида у Буюк Британия, Германия, Италия, Канада, АҚШ, Франция ва Япония иштирокидаги ушбу форматдаги ҳамкорлик кўп фойда келтиришини таъкидлади.

Россия 1997 йилдан буён 17 йил давомида халқаро G8 клубининг аъзоси бўлган. Унга икки марта раислик қилган. 2006 йилда Санкт-Петербургда G8 саммити бўлиб ўтди. 2014 йилда Сочида етакчиларнинг учрашуви ўтказилиши режалаштирилган эди. Бироқ март ойида Қримни босиб олгач, Ғарб давлатлари G8 форматидан Россияни четлатди ва G7 форматига қайтди.

#АҚШ #Россия #Доналд Трамп