Жаҳон | 22:54 / 16.06.2025
12276
2 дақиқада ўқилади

Нетаняҳу Али Хоминаийнинг ўлдирилишини истисно этмади

«Бу можарони кескинлаштирмайди, аксинча, унга барҳам беради», деди Нетаняҳу.

Фото: ABC

Исроил бош вазири Бинямин Нетаняҳу Эрон олий раҳбари Али Хоминаийни ўлдириш бўйича операцияни истисно қилмади, деб хабар берди ABC News.

Аввалроқ, президент Доналд Трамп можарони кескинлашиб кетишидан чўчиб, Исроилнинг Эрон олий раҳбарини ўлдириш режасини рад этгани ҳақидаги хабарлар тарқалган эди.

«Бу можарони кескинлаштирмайди, аксинча, унга барҳам беради», деди Нетаняҳу.

Исроил бош вазири шунингдек, Эрон режими ярим асрдан бери Яқин Шарқда «можароларни тарқатиб» келаётганини ва «ҳаммани даҳшатга солаётганини» айтди.

Исроил ҳақиқатан ҳам Эроннинг олий раҳбарини нишонга оладими, деган саволга Нетаняҳу давлат «халқ учун керакли ишни қиляпти», деди.

Reuters агентлигининг 15 июн куни хабар беришича, Исроилда Эрон олий раҳбарига суиқасд уюштириш имконияти бўлган, бироқ бу режага АҚШ президенти Доналд Трамп вето қўйган. Оқ уйнинг юқори мартабали аноним мулозимининг айтишича, Эрон режими «бирорта ҳам америкаликни ўлдирмаган» ва бу содир бўлгунга қадар Вашингтон «Ислом республикаси сиёсий раҳбариятини таъқиб қилиш ҳақида гапирмайди».

Нетаняҳу Reuters нашрининг бу хабарини «ҳеч қачон содир бўлмаган суҳбатлар ҳақида кўплаб ёлғон хабарлар бор» деб изоҳлади. Аммо у Исроил расмийлари «халқ учун керак бўлган ишни қилишини» таъкидлади.

Мавзуга оид