Ўзбекистон ва Покистон қишлоқ хўжалиги техникаларини биргаликда ишлаб чиқаради

Ўзбекистон Инвестициялар, саноат ва савдо вазирлиги ҳамда Ўзбекистон элчихонаси кўмагида "AgroTech Klaster" МЧЖ вакилларининг Покистонга ишчи сафари ташкил этилди. Лаҳор шаҳрига сафар давомида Покистоннинг трактор ва бошқа қишлоқ хўжалиги техникаларини ишлаб чиқарувчи компаниялари билан музокаралар ўтказилди.

Ўзбекистон делегацияси аъзолари, шунингдек, Покистон Саноат ва ишлаб чиқариш вазирлиги, Millat Tractors, Al-Ghazi Tractors, "Покистон автомобил ва қишлоқ хўжалиги учун эҳтиёт қисмлари ишлаб чиқарувчилар уюшмаси", Hamza Wazir Tractors, Buraq tractors каби етакчи трактор компанияларининг ишлаб чиқариш қувватлари ва қўлланиладиган технологиялар билан жойида танишди.

AgroTech Klaster МЧЖ томонидан ишлаб чиқариладиган трактор ва бошқа қишлоқ хўжалиги техникалари тақдимоти ўтказилди. Тақдимотда уларнинг афзалликлари, техник кўрсаткичлари тўғрисида ҳамкор томонни қизиқтирган саволлар бўйича атрофлича маълумотлар берилди.

Музокаралар чоғида икки томонлама манфаатли ҳамкорликни янада ривожлантириш, трактор ва турли қишлоқ хўжалиги техникаларини Ўзбекистон ва Покистонда биргаликда ишлаб чиқариш имкониятлари муҳокама қилинди.

Мамлакат делегацияси вакиллари, шунингдек, Покистон машинасозлик, жумладан трактор воситалари ва қишлоқ хўжалиги техникалари бозорига оид маркетинг маълумотлари, маҳаллийлаштириш даражаси, соҳага оид қонунчилик талаблари билан ҳам батафсил танишди.

Музокаралар натижасида 50-85 от кучига эга бўлган, икки давлат иқлимига мослаштирилган тракторларни ва бошқа қишлоқ хўжалиги техникаларини ҳамда улар учун эҳтиёт қисмларни биргаликда ишлаб чиқаришни илгари суриш, маҳсулотлар нархини оптималлаштириш масалаларида келишувларга эришилди.

Ўзаро мулоқотни давом эттириш, AgroTech Klaster МЧЖ фаолияти билан жойида танишиш, янги истиқболли лойиҳаларни муҳокама қилиш учун Покистоннинг қишлоқ хўжалиги техникалари ишлаб чиқарувчилари Ўзбекистонга таклиф этилди.