Трамп Путиннинг ёлғон гапираётганини билади – Макрон
Франция раҳбари АҚШ президенти «Владимир Путиннинг Украина ҳақидаги ёлғонларининг айрим жиҳатларидан хабардор» деган фикрни билдирди.

Фото: AP
АҚШ президенти Доналд Трамп Россия президенти Владимир Путин унга тинчликка тайёрлиги ҳақида ёлғон гапирганини тушунди. Бу Франция президенти Эммануэл Макроннинг фикри, деб ёзди The Guardian.
Ветнамга дипломатик сафарда бўлган Макрондан сўнгги кунларда Россиянинг Украинани ўққа тутаётганига изоҳ бериш сўралди.
Франция раҳбари АҚШ президенти «Владимир Путиннинг Украина ҳақидаги ёлғонларининг айрим жиҳатларидан хабардор» деган фикрни билдирди.
У Трампнинг «Путинга бўлган ғазаби» тегишли чораларга олиб келишига умид қилишини айтди. Франция президенти, эҳтимол, АҚШ Европа Иттифоқи билан биргаликда Россияга қарши қўллаши мумкин бўлган санкцияларни назарда тутган, деб ёзди нашр.
Аввалроқ, 25 майдан 26 майга ўтар кечаси Россия армияси Украина шаҳарларини оммавий ўққа тутди. Украинанинг турли минтақаларида 13 нафар тинч аҳоли ҳалок бўлди. Хусусан, Житомир вилоятида Россия ракетаси бир оиладан уч нафар болани ўлдирди.
Бунинг ортидан АҚШ президенти Трамп Путинга қарши кескин гапириб, уни ақлдан озганликда ва асоссиз қотилликда айблади. Унинг сўзларига кўра, Путин билан жуда яхши муносабатда бўлган, бироқ «унга нимадир бўлган».
Кремль Америка президентининг баёноти «ҳиссий босим таъсирида» бўлганини маълум қилди.
Мавзуга оид

14:25
Кремл: Украина билан музокаралар янги босқичи меморандумларни ўрганиб чиққандан сўнг келишилади

12:12
Словакия депутатлар Россияга қарши санкциялар учун овоз бермасликка чақирди

09:30
Дронлар Брянск, Энгелс ва Москвага ҳужум қилди

23:27 / 05.06.2025