Германия ва Европанинг уч давлати етакчилари Трамп билан Украинани муҳокама қилди

АҚШ президенти Доналд Трамп ва Россия президенти Владимир Путин ўртасида кутилаётган суҳбат олдидан Германия, Буюк Британия, Франция ва Италия давлат ва ҳукумат раҳбарлари 18 май, якшанба куни кечқурун Америка етакчиси билан Украинадаги вазиятни муҳокама қилишди.

«Германия канцлери Фридрих Мерц якшанба куни кечқурун (18 май) АҚШ президенти Доналд Трамп ҳамда Франция, Буюк Британия ва Италия давлат ва ҳукумат раҳбарлари билан Украинадаги вазият ҳамда АҚШ ва Россия президентлари ўртасида бўлажак телефон суҳбатини муҳокама қилди. Фикр алмашиш Трамп ва Путин ўртасидаги душанбага режалаштирилган суҳбатдан сўнг дарҳол давом этади», — дея ёзди немис расмийси Штефанус Корнелиус матбуот учун баёнотда.

Ўз навбатида, Буюк Британия бош вазири Кир Стармернинг аниқлик киритишича, Европа етакчилари ва АҚШ президенти ўртасидаги суҳбатда асосий эътибор «Украинадаги вазият ва урушнинг ҳар икки томон учун ҳалокатли баҳоси» ҳақида бўлган.

Матбуот котиби таъкидлаганидек, Россия ўт очишни тўхтатиш ва тинчлик музокараларини олиб бориш учун жиддий саъй-ҳаракатлар қилмаса, бошқа нарсалар қаторида санкциялар қўлланиши муҳокама қилинди.

Ўз навбатида, Франция президенти Эммануэл Макрон ўзининг X микроблогида Европанинг тўрт етакчиси ва Доналд Трамп ўртасидаги суҳбатдан сўнг қуйидагиларни ёзди: «Эртага президент Путин президент Трамп таклиф қилган ва Украина ва Европа томонидан қўллаб-қувватланган 30 кунлик шартсиз ўт очишни тўхтатиш келишувини қабул қилиб, тинчликни хоҳлашини кўрсатиши керак».