Россия ва Украина Истанбулда асирларни алмашиш борасида келишиб олди

«1000 га 1000» форматида асирлар алмашинуви «яқин кунларда» бўлиб ўтади, деди Россия ва Украина делегациялари раҳбарлари Владимир Мединский ва Рустем Умеров. Уларнинг фикрича, музокараларни давом эттириш истиқболи мавжуд.

Фото: AP

16 май куни Истанбулдаги музокараларда Украина ва Россия делегациялари «яқин кунларда» «1000 га 1000» форматида асирлар алмашинувини амалга оширишга келишиб олдилар. Бу ҳақда Россия ва Украина делегациялари раҳбарлари, Россия президенти ёрдамчиси Владимир Мединский ва Украина мудофаа вазири Рустем Умеров учрашувдан сўнг гапирди.

Умеровнинг сўзларига кўра, тўғридан тўғри музокаралар чоғида президентлар Владимир Путин ва Володимир Зеленскийнинг шахсий учрашуви ҳам муҳокама қилинган. Украина делегацияси раҳбарининг қўшимча қилишича, Россия билан эҳтимолий янги музокаралар «яқин вақт ичида эълон қилинади».

Мединский журналистларга Россия томони «учрашув натижаларидан умуман қониқиш ҳосил қилгани» ва «алоқаларни давом эттиришга тайёрлигини» айтди. Россия президенти ёрдамчисининг сўзларига кўра, Украина томонининг Путин ва Зеленский ўртасида тўғридан тўғри музокаралар ўтказиш ҳақидаги илтимоси «инобатга олинган». Мединский шунингдек, томонлар ўт очишни тўхтатиш бўйича батафсил режаларни алмашгандан сўнг музокараларни давом эттиришга келишиб олганликларини айтди.

Россия ва Украина ўртасида 2022 йилдан буён биринчи тўғридан тўғри музокаралар тахминан бир ярим соат давом этди. Дастлаб учрашув шу куни давом этиши мумкинлиги хабар қилинганди. Бироқ ахборот агентликлари шундан сўнг музокаралар «тўхтатилгани» ҳақида хабар қилди ва делегациялар раҳбарлари матбуотга баёнот берди.

#Украина #Россия