АҚШ мигрантлар учун Америка фуқаролигини берадиган реалити-шоу ўтказади

АҚШ ички хавфсизлик вазири Кристи Ноэм бир гуруҳ мигрантлар турли синовлар орқали Америка фуқаролигини оладиган реалити-шоу ғоясини илгари сурмоқда. Бу ҳақда Daily Mail нашри Ноэм томонидан тайёрланган 35 бетлик тақдимотга асосланиб хабар берди.

Шоунинг тахминий номи - «Америкалик». Daily Mail томонидан эълон қилинган тақдимот слайдларидан бири шоунинг форматини белгилайди: Ҳар бир эпизодда «мерос билан боғлиқ синов», «ютқазган чиқиб кетадиган синов», шаҳар мэриясида учрашув ва якуний овоз бериш жараёни бўлиши керак. Овозлар Ноэм таклифига кўра, АҚШ Фуқаролик ва Иммиграция Хизматлари ходимлари томонидан ҳисобланади.

Кўрсатув бошловчиси, ижодкорларнинг фикрига кўра, фуқароликка қабул қилинган таниқлик америкаликлардан бири (масалан, Украинада туғилган актриса Мила Кунис) бўлиши керак.

Иштирокчилар Америка бўйлаб саёҳат қилиши, ҳар бир штатнинг ўзига хос хусусиятлари билан танишиши ва нима учун Қўшма Штатларга кўчиб ўтишни истаётганини тушунтириши керак. Улар ўтиши керак бўлган синовлар қаторига, масалан, Сан-Франциско ҳудудидаги конларда олтин қазиб олиш ва Детройтдаги конвейерда Форд Модел Т автомобилини йиғиш ҳам бор.

Финалда ғолиб бўлган шахс фуқароликни олади ва Капитолий зинапоясида қасамёд қилади. Қолган иштирокчилар эса 10 минг долларлик Starbucks совға картаси ёки 76 октанли бензиннинг умрлик захираси билан таъминланади. Шунингдек, тегишли текширувдан сўнг фуқароликка ариза беришда афзалликларга эга бўлади.

Ички хавфсизлик вазирлиги вакили Триша Маклафлин шоу ғояси муҳокама қилинаётганини тасдиқлади, бироқ Ноэм тақдимотни ҳали кўрмаганини таъкидлади.