Песков: Россия делегацияси музокаралар учун 15 май куни Истанбулга боради

Россия делегацияси 15 май куни Истанбулда музокаралар учун Украина вакилларини кутади, деди Россия президенти матбуот котиби Дмитрий Песков. «Бизнинг делегациямиз у ерда бўлади ва Украина томонини кутади», деди у 13 май, сешанба куни ВГТРК журналисти Павел Зарубинга берган изоҳида.

Шу билан бирга, Песков яна Россия музокара гуруҳи таркибини ошкор қилишдан бош тортди. «Президент буйруқ берганида, биз буни қиламиз», деди Кремль вакили.

Аввалроқ АҚШ давлат котиби Марко Рубио Россия ва Украина ўртасидаги музокараларда иштирок этиши маълум бўлган эди. АҚШ президенти Доналд Трамп Саудия Арабистонида бўлиб ўтган сармоявий форумда сиёсатчи «у ерга бормоқчи» деди. У музокаралардан «жуда яхши натижалар» кутаётганини қўшимча қилди. Ғарб матбуотига кўра, Трампнинг махсус вакиллари Стив Уиткофф ва Кит Келлог ҳам музокаралар учун Истанбулга йўл олади.

Украина президенти Володимир Зеленский аввалроқ Туркия президенти Ражаб Тоййиб Эрдўған билан Анқарада учрашишга келишиб олганини, бироқ Россия президенти Владимир Путин Туркия пойтахтига боришдан бош тортса ва Истанбулни танласа, Зеленский ва Эрдўған ҳам у ерга боришга тайёрлигини айтди. «Биз Путин билан бу учрашув бўлиб ўтиши учун ҳамма нарсани қиламиз. Фақат у ўт очишни тўхтатиш бўйича қарор қабул қилиши мумкин», — дея таъкидлади Украина раҳбари.