Хитой Украинадан Москвадаги парад вақтида ҳужум қилмасликни сўраган

Украина Қуролли кучлари Хитой сўровига биноан Москвадаги Ғалаба парадини бузишга уринишлардан воз кечди, деди мамлакат президенти Володимир Зеленский.

Зеленский сўзларига кўра, Хитой Украина томонидан таклиф қилинган 30 кунлик ўт очишни тўхтатиш режимини қўллаб-қувватлаши ҳақида ишора олган. Шунингдек, Хитой Иккинчи жаҳон уруши тугаганининг 80 йиллигини нишонлаш чоғида «кўплаб етакчилар, жумладан, Хитой раиси ҳам бор жойда хавфсизлик таъминланиши» адолатдан бўлишини маълум қилган. Украина расмийлари бунга рози бўлган.

«Украина ҳар доим ваъда қилган нарсани бажаришини яна бир бор тасдиқлади. Россия пропагандасига қарамай, 9 май куни уларнинг парадига ҳужумлар бўлмади», деди Зеленский.

Апрел ойи охирида Путин Украинага 8 майдан 10 майгача, шу жумладан, уч кунлик оташкесим таклиф қилган эди. Киев буни расман рад этди: Зеленский Россия президенти шунчаки «парад пайтида сукунатни таъминлашни» хоҳлаётганига ишонч билдирди ва бунинг ўрнига 30 кунлик тўлиқ сулҳ зарурлигини айтди.

Параддан бир неча кун олдин Украина ҳукумати амалдорлари, жумладан, Зеленскийнинг ўзи ҳам Украина уни бузишга уриниши мумкинлигига қайта-қайта шама қилган эди. 7 май куни Москвага Украина дронлари томонидан ҳужум уюштирилди, бу эса аэропортлар фаолиятининг тўхтатилишига ва юз минглаб йўловчиларга таъсир кўрсатган транспорт тирбандлигига олиб келди.

Путин томонидан эълон қилинган сулҳ бошланганидан сўнг, Украина оммавий ахборот воситалари ёзганидек, кўплаб Украина ҳарбий қисмлари фақат Россия ҳужумларига жавобан ўт очиш ҳақида буйруқ олди.