Трамп Истанбулдаги музокараларга агар Путин ҳам келадиган бўлса боради — Келлог

«Президент Путин ҳам [Истанбулдаги музокараларга] боришига умид қиламиз ва шунда у ерга президент Трамп ҳам боради. Бу мутлақо кутилмаган учрашув бўлиши мумкин», — дейди АҚШ президентининг Украина бўйича махсус вакили Келлог.

Америка президенти маъмуриятининг яна бир юқори мартабали амалдорининг айтишича, Трампнинг Истанбулга бориш эҳтимоли ҳақидаги баёноти Путинга «катта босим» ўтказган.

Махсус вакил АҚШ аввало ўт очишни тўхтатиш тарафдори экани, урушаётган томонлар шундан кейингина бошқа масалаларни муҳокама қилиши лозимлигини эслатиб ўтди.

Келлогнинг сўзларига кўра, урушни тўхтатиш масалалари доирасида, шунингдек, Буюк Британия, Франция, Германия ва Полша ҳарбийларининг Днепрнинг ғарбий қисмига жойлаштирилиши ҳам муҳокама қилинади.

Олдинроқ Доналд Трамп 15 май куни Истанбулда ўтказиладиган Россия—Украина музокараларига ташриф буюриши мумкинлигини айтганди. «Мен учиб келиш ҳақида ўйладим. Пайшанба куни қаерда бўлишимни билмайман. Кўп учрашувларим бор, лекин аслида учиб бориш ҳақида ўйладим. Агар бирор нарса бўлиши мумкинлигини тушунсам, шундай имконият бор деб ўйлайман», — деган у.

11 май куни Украина президенти Володимир Зеленский Истанбулда РФ президенти Владимир Путин билан учрашишга тайёрлигини маълум қилган эди. Ўз навбатида президент матбуот котиби Дмитрий Песков Россия «узоқ муддатли тинч йўл билан келишувга эришиш йўлларини жиддий излашга» бел боғлаганини таъкидлаган. Бироқ у Зеленскийнинг Путинга музокараларда шахсан иштирок этиш таклифига изоҳ бермаган.