«Росатом» Ўзбекистондаги кичик АЭС блоки учун ускуналар ишлаб чиқаришни бошлади

«Росатом» Ўзбекистонда Россия лойиҳаси бўйича қурилаётган кичик атом электр станциясининг (АЭС) биринчи блоки учун реактор ускуналарини ишлаб чиқаришни бошлади.

«Бугунги кунда «Росатом» Ўзбекистондаги камқувватли атом электр станциясининг биринчи блоки учун реактор ускуналарини ишлаб чиқаришни бошлади», дейилади матбуот хизмати хабарида.

Қўшимча қилинишича, корпорациянинг Санкт-Петербургдаги заводи РИТМ-200Н реактор блоки учун оғирлиги 205 тонна бўлган биринчи қуймани қуйган.

«Пўлат қуйиш - бу ядро реакторини яратиш жараёнининг бошланиши», деб қўшимча қилди «Росатом».

Эслатиб ўтамиз, Ўзбекистон ва Россия ўртасида 2024 йил 27 майда имзоланган шартнома асосида, Жиззах туманида умумий қуввати 330 MW бўлган, ҳар бири 55 MW қувватга эга 6 та реактордан иборат камқувватли АЭС қурилиши кўзда тутилган.

Станция асосини ҳозиргача музёрар кемаларда қўллаб келинган РИТМ-200 сув-сувли ядро реакторларининг қуруқликда ишлашга мослаштирилган РИТМ-200Н версияси ташкил этади. Аммо ҳозиргача бу технология қуруқликда ишлатилмаган. Лойиҳа қиймати 2 млрд доллардан ошмаслиги, харажатлар асосан ташқи қарзлар ҳисобига бўлиши маълум қилинган.

«Ўзатом» ўтган йилги баёнотида АЭС биринчи реакторини ишга тушириш 5 йилдан кейинга режалаштирилганини билдирганди.

Шу йил апрель ойида Жиззах туманида РИТМ-200Н реакторига эга камқувватли атом электр станцияси лойиҳаси учун қурилиш-монтаж базаси, бинолари қурилиши бошланди.