Вазирлар Маҳкамаси биноси маданий мерос объектлари рўйхатига киритилади

Тошкентдаги Мустақиллик майдони кўчасида жойлашган Вазирлар Маҳкамаси биноси маданий мерос объектлари рўйхатига киритилиши кутилмоқда.

Фото: gov.uz

Маданий мерос агентлиги томонидан ишлаб чиқилган қарор лойиҳаси Моддий маданий мероснинг кўчмас мулк объектлари миллий рўйхатига ўзгартириш ва қўшимчалар киритишни назарда тутади. Унга кўра, Мустақиллик майдони кўчасида жойлашган Вазирлар Маҳкамаси биносини ҳам рўйхатга киритиш кўзда тутилмоқда.

Рўйхатга яна 130 га яқин объектларни киритиш режалаштирилган. Улар орасида масжидлар, музейлар ва турар жой бинолари ҳам бор. Тошкент шаҳри Шота Руставели, Бешёғоч кўчаларидаги қатор уйлар, Санъатшунослик илмий-тадқиқот институти биноси, Павел Бенков номидаги Республика ихтисослаштирилган рассомлик мактаби бинолар мажмуаси бор.

Ўзбекистон халқининг умуммиллий бойлиги ҳисобланадиган моддий маданий меросини муҳофаза қилиш, асраш ва улардан фойдаланилиши устидан давлат назоратини амалга ошириш, ёдгорликларини тартибга солиш, рўйхатини шакллантириш, тарихийлигини сақлаш ҳамда уларнинг аҳамиятини ошириш учун шарт-шароитлар яратиш мақсад қилинган.

#Вазирлар Маҳкамаси #маданий мерос