Британия разведкасига илк бор аёл киши раҳбарлик қилади

Буюк Британиянинг Махфий разведка хизматига MI6 тарихида илк бор аёл раҳбар тайинланади, деб хабар бермоқда The Telegraph.

Маълумотларга кўра, номзодлардан камида иккитаси MI6 нинг амалдаги аёл ходимлари ҳисобланади, шу боис уларнинг исмлари ошкор қилинмаган. Номзодлардан бири – MI6 муҳандислик бўлими раҳбари бўлиб, у амалдаги директорнинг эҳтимолий вориси сифатида тилга олинмоқда.

Яна бир номзод — Барабара Вудворд. У илгари Британия Чегара агентлигини бошқарган, ҳозирда эса Бирлашган Қиролликнинг БМТдаги доимий вакили лавозимида фаолият юритяпти.

Амалдаги MI6 раҳбари Ричард Мур илгари дипломатик хизматда ишлаган, кейин эса Буюк Британиянинг Туркиядаги элчиси бўлган, 2020 йилда эса MI6 га директор сифатида қайтган. Унинг лавозимдаги 5 йиллик муддати шу йил якунланади ва ўрнига кадр танлаш жараёни жадаллашган.

Мур 2023 йилда лавозимга фақат эркаклар рўйхатидан танлаб олинганини таъкидлаб, эндиликда бундай ёндашувга чек қўйилишини ва аёлларнинг ҳам тенг имкониятга эга бўлишини айтган эди.

Барабара Вудворд Британия дипломатик хизматидаги энг юқори мартабали аёл ҳисобланади. Бироқ у 2015–2020 йилларда Пекиндаги элчилик даврида Хитойга нисбатан етарлича қатъий позиция тутмагани учун танқид қилинган.

Тайинлов бўйича якуний қарор Британия бош вазири Кир Стармер томонидан ташқи ишлар вазири Дэвид Лэмми ҳамда миллий хавфсизлик бўйича маслаҳатчи Жонатан Пауэлл тавсияси асосида амалга оширилади.

Ички хавфсизлик хизматига (MI5) эса илгари икки аёл раҳбар — Стелла Римингтон ва Элиза Меннингем-Буллер раҳбарлик қилган. Аммо 1909 йилда ташкил этилган Британия разведкасини ҳозиргача бошқарган 17 раҳбарнинг барчаси эркаклардир.