Украинада 10 май куни «кўнгиллилар коалицияси» учрашувлари ўтказилади

10 май куни Украинада, хусусан, Россия Федерацияси ва Киев ўртасидаги уруш тугаганидан сўнг тинчликпарвар контингентни яратиш режалари билан шуғулланувчи «кўнгиллилар коалицияси» доирасида учрашувлар бўлиб ўтади. Украина президенти Володимир Зеленский 9 май, жума куни Бирлашган экспедиция кучлари таркибига кирувчи давлатлар раҳбарларига мурожаатида бўлажак музокаралар ҳақида маълум қилди.

«Украинада биз кўнгиллилар коалицияси раҳбарлари билан учрашувга ҳам тайёргарлик кўрмоқдамиз, олдинда жиддий ишлар кутиб турибди. Бизга бу коалиция керак ва у бизнинг умумий қарашларимизга мувофиқ хавфсизликни кафолатлайдиган даражада кучли бўлиши керак», — дея таъкидлади Зеленский.

«Ишончим комилки, Европа бундай жамоавий ишдан фақат фойда кўради — бу бутун мавжуд хавфсизлик архитектурасини мустаҳкамлашга ёрдам беради. Учрашувлар - эртага», — дея қўшимча қилди у.

«Кўнгиллилар коалицияси»га, хусусан, Германия, Буюк Британия ва Франция киради. Жами гуруҳ 30 га яқин давлатни қамраб олади.